Lasa faritra mena amin’ny  tsy fandriampahalemana tanteraka any Soanierana Ivongo amin’izao fotoana izao.  Miaina ao anatin ’ ny tebiteby sy ny tahotra ny mponina any an-toerana amin’ny afitsok’ireo jiolahy. Nitrangana fanafihana mitam-piadiana tao an-tampon-tananan’i Soanierana Ivongo, ny alarobia hifoha alakamisy, tamin’ny 1 ora maraina. Renim-pianakaviana iray sy ny zanany vavy tsy ampy taona no nanamparan’ireo jiolahy ny habibiany. Tsy tao an-toerana ny raim-pianakaviana tamin’io fotoana io fa lasa nanantanteraka iraka taty an-drenivohitra. Efa lasa lavitra ireo olon-dratsy vao sahy niantso vonjy izy ireo. Naratra mafy izy mianaka taorian’izay ary noentina haingana tany amin’ny hopitaly. Lasan’ireo ny vola 2 tapitrisa sy ny entana sarobidy tao an-trano.

Mandry tsy lavo loha ny mponina

Mihorohoro tanteraka, noho ny, asan-jiolahy ny mponina any an-toerana. Araka ny vaovao voaray dia tsy mifidy olona sy ora hanaovana ny asa ratsiny ireo mpanafika fa izay tratrany dia mitondra faisana avokoa. Mitombo isa hatrany ireo olon-dratsy ao an-tampon-tanànan’i Soanierana Ivongo. Ankoatra ireo mpanao fanafihana mitam-piadiana dia hita manerana ny tsena sy ny toerana maro olona ny mpanendaka, ny jiolahy manao hazalambo ny mpandraharaha sy ny olon-tsotra amin’ny fandrobana miharo herisetra.

Laurena Nany