Kamiao lehibe iray mitondra kaontenera nisy simenitra 25 taonina no nivadika teo am-povoan-dalana, omaly maraina, tamin’ny 10 ora sy sasany, tany amin’ny lalana mampitohy Ampanefena sy Sambava. Avy any Vohemara io kamiao ary io nivadika tampoka rehefa tonga tao Antanimenabe izay lalana 4 kilometatra niala ny tananan’Ampanefena. Ny mpamily sy ny mpanampy azy ihany tao anatin’izany fiara izany. Araka ny fanambaran’ny mpamily dia ny fahalanian’ny hafainganam-pandeha no nahatonga ny loza. Tery ilay lalana ary ka raha nihemotra ilay fiara dia nivadika avy hatrany. Tsy nisy koa ny aina nafoy fa ilay mpanampy ny mpamily no naratra mafy. Araka ny fantatra dia tapaka mihitsy ny tratran’ilay lehilahy.

Nahasorena ireo mpampiasa izany lalana izany kosa ity lozam-pifamoivoizana ity, indrindra ireo taksiborosy. Tapaka tanteraka mantsy ny lalana, noho, io kamiao io mitsivalana be eo an-dalana. Efa misokatra ny fanadihadiana sy ny fomba rehetra hanalana io fiara io eny am-povoan-dalana.