Roa andro taorian’ny nampivadika ilay lakana mandeha maotera iray, tany amin’ny tanàna Andrangalava, kaominina Fetraomby, distrikan’i Brickaville dia hita natsingevan’ny reniranon’i Pangalana, ny alarobia lasa teo, ny fatin’ilay vehivavy tsy hita popoka. Efa simba tanteraka ny razana tamin’ny fahitana izany ka tsy noandrasana intsony fa avy hatrany dia nalevina rehefa vita ny vata-paty nasiana azy. Raha tsiahivina dia ny alatsinainy 4 janoary, tokony tamin’ny 8 ora maraina, no nitrangan’ny loza, noho, ny fahasimban’ny maotera. Nidona tamin’ny vato ilay lakana ka nivadika izay niteraka fahafatesan’ny zazavavy kely 3 taona fa tsy hita popoka kosa ilay vehivavy tamin’izay fotoana izay. Noho ny, vesatra tafahoatra nentin’io lakana io no fantatra fa antony nampivadika izany. Efa mihoatra ny 2 taonina sy sasany ny vesatra tafahoatra tamin’io fotoana io, satria novinavinaina ho hatrany amin’ny 30 isa mahery ireo olona noentin’ilay lakana, araka ny loharanom-baovao. Marihina fa vao niseho sy nitranga ny loza dia nandositra ny mpamilin’ilay lakana sy ireo mpiasa tao. Mitohy ny fikarohana azy ireo.

Laurena Nany