Tsy tana intsony ny ain’ilay miaramila fa maty teo no ho eo, vokatry ny tsindron’antsy nihatra taminy. Nanasaraka olona roa niady no nahatonga ny loza. Maty teo am-perinasa ity miaramila ity, araka ny tatitra voaray avy amin’ny zandary.

Nisy olona roa niady, tao amin’ny fokontany sy kaominina Antsoha, any amin’ny distrikan’Antsiranana II, ny 7 janoary lasa teo, tamin’ny 9 ora alina. Tsy fantatra ny nahatonga ny ady fa sendra nandalo avy niasa ilay miaramila no nahita izany ka niezaka nanelanelana ireo lehilahy roa. Tsy nanaiky nosarahana anefa ireto farany fa vao mainka nihamafy ny fifandonana. Tsy vitan’izany fa mbola naka antsy kely avy any anaty paosiny ny iray tamin’ireo mpifanandrina ary raha hanindrona izany an’ilay nifandona taminy dia nahavoa ilay miaramila. Nahazo teo amin’ny faritry ny kibony izany ary nahavoa ny tsinainy tany ka nitarika ny fahafatesany. Noraisin’ny fianakaviana ny razana taorian’ny fizahana nataon’ny mpitandro filaminana sy ny mpitsabo.

Natahotra ny iharan’ny fitsaraham-bahoaka dia nandositra avy hatrany ilay nahafaty io mpitandro filaminana io. Nilaza tsy hipetra-potsiny, raha teo, ny fianakavian’ny maty sy ireo fokonolona vavolombelon’ilay tranga. Efa mandeha ny fikarohana ilay nahavanon-doza.

L.N