Nisehoana lozam-piaramanidina, teny amin’ny seranam-piaramanidina Ivato, distrika Ambohidratrimo, ny 9 janoary lasa teo, tamin’ny 7 ora sy 30 minitra hariva. Sendra ny tsy nampoizina ny fiaramanidina an’ny kaompania Turkish Airlines  avy any Istanbul Turquie, izay nipetraka teny Ivato, io alin’io. Araka ny fanazavana voaray dia lasa aloha loatra ny fipetrahan’ilay fiaramanidina ka nandona ny « antenne équaliseur » ny kodiarana haviany. Tsy nisy nahatsikaritra ny zavatra niseho ireo tompon’andraikitra teny an-toerana raha tsy efa ilay mpanamory niteny fa nahadona zavatra rehefa tafapetraka.  Tsy nisy ny aina nafoy na naratra teo amin’ireo mpandeha fa vaky kosa ny kodiarana havia aoriana ary simba ny « antenne ». Nandray fepetra kosa ny eo anivon’ny Biac amin’ny mba tsy hisidinan’io fiaramanidina io mandra-piandry ny fanadihadiana rehetra.