Amin’izao taom-baovao izao dia mikaroka izay hampiavaka azy  ny mpitondra fiara karetsaka eny amin’ny manodidina Ankatso sy Tsiadana. Fikambanana fiara karetsaka miisa 15 izy ireo no niara nikaon-doha ka namorona akanjo mitovy  entina miasa mba hitovizany  izy ireo. Miloko roa ka  maitso mazava alina sy mainty ary misy soratra « Taxi » eo amin’ny tratrany. “Nosafidiana ilay loko mazava alina satria misy aminay no miasa alina” hoy ny mpamily iray ka mora no hahafantaran’ny mpandeha efa zatra anay.Omaly faha 11 janoary no niakanjony izy ireo izany voalohany. Marihina fa io fikambanana fiara karetsaka io no voalohany namorona ny fitafiana entina miasa, mba hampiavaka azy ary ho fitaratra ho an’ny hafa, hoy hatrany ny mpamily iray. Ho mora kokoa ny hanavahan’ny mpandeha sy ireo izay efa nahafantatra azy ireo. Ary ho matihanina eo amin’ny fitaterana. Misy ihany ireo Malagasy no mitady izay hahatsara sy hanavao ny fomba fiasa fa eo ihany koa ny mikendry ny hanimba sy hanaratsy lalandava.