Nisehoana tranga hafa kely indray teny amin’ny faritra Andoharanofotsy ny alatsinainy alina lasa teo, tokony tamin’ny 10 ora teo no niseho ny tantara. Mpivady tratra alina indray no niharan-doza raha hamonjy fodiana. Teny an-dalana mantsy dia nifanena tamin’ny tovolahy tokony eo amin’ny 26 taona izy roa kely. Ity farany izay avy dia nanatona sy niresaka tamin’ilay ramatoa. Tezitra noho izany ilay rangahy vadiny ka nampiaka-peo sy nikasi- tanana ilay tovolahy vao erotrerony. Niafara tamin’ny ady moa izany ka dia raikitra ny totohondry tanaty fotaka nandritra ny orana nikija mafy. Vokatry ny fifampikasihan-tanana dia naratra mafy teo amin’ny loha sy ny faritry ny maso ilay zazalahy. Tao aorian’izany dia nentina teny amin’ny tobim-pahasalamana CSBII Andoharanofotsy ilay lehilahy izay efa tsy nahatsiaro tena intsony. Tsy voalohany amin’ny tranga toy itony ity niseho ity fa efa maro ireo tratra alina misy manendaka sy manao sinto-mahery, ary fampiresahana tsotra foana no tetika entin’ireo olon-dratsy manatanteraka izany.

Indrindra moa amin’izao vaninandro fahavaratra izao, miampy ny tsy fisian’ny poton-jiro izay manome vahana ireo mpanao ratsy. Ka raharaha notadiavina ve sa fiarovana no nataon’ny vadin’ilay ramatoa ?

T.A.