Tao Ambodiatafana distrikan’i Sainte Marie no nitranga ny tantara. Ankizivavy 15 taona no voalaza fa nisy nanolana ny herinandro lasa teo. Tsy mbola fantatra mazava kosa anefa ny fitrangan’ity fanolanana ity saingy voaporofo kosa fa nisy ny fanolanana. Rehefa nitantara ny nanjo azy tamin’ny ray aman-dreniny ity tovovavy ity dia nentina nizaha mpitsabo avy hatrany. Nahazo ny fanamarinana avy tamin’ity farany noho izany izy ireo vao nandeha nitory teny amin’ny mpitandro filaminana.

Natao ny famotorana sy fakana am-bavany ilay voaolana ka nandritra izany no nilazany fa teratany vahiny no nanapatra ny filany taminy. Mba hanamarinana ity tranga ity dia nandefasana taratasy fampiantsoana azy ilay voalaza fa nanolana. Tsy hita tao amin’ny misy azy anefa ilay vazaha ka voatery nokarohina. Vetivety ihany koa dia niely ny resaka momba ity raharaha ity ka efa samy niomana ny hisambotra sy nanao ny fikarohana avokoa ireo fokonolona.

Nisy nahita ny nitoeran’ilay vazaha ary io olona io no avy dia niantso  ny mpitandro filaminana. Nosamborina avy hatrany moa ity voarohirohy ity.

N.F