Nihotsaka ny tetezana vita amin’ny vy lehibe izay milanja 10 taonina, any an-tampon-tanànan’i Manakara noho ity foto-drafitr’asa  ity efa antitra sy harafesenina, ny alahady maraina no nisehoan’izany. Vehivavy iray 50 kilao sendra handeha hivavaka vao maraina ary niampita izany tetezana izany no tra-doza.

Teo amin’ny faritra izay nisy ity ramatoa ity mihitsy no nihotsaka ka nisarika azy nidoboka koa. Vokany, naratra mafy ilay ramatoa. Tapaka mihitsy ny tongony noho ny dona mafy be nihatra taminy, araka ny loharanom-baovao avy any an-toerana. Efa manaraka fitsaboana amin’ny hopitaly any an-toerana izy amin’izao fotoana izao ary tsy misy atahorana ny ainy.

Marihina fa efa simba ny tapany havanana an’ ity tetezana ity izay nangatahan’ny mponina fanamboarana saingy notohizana tamin’ny hazo sy vy manify fotsiny izany mba ahafahan’ izy ireo mivezivezy ka izao ny ilany tapaka izao indray. Mangataka amin’ireo manam-pahefana mahefa noho izany ny mponina any an-toerana mba hanamboarana tsara ity foto-drafitr’asa ity fa tsy andrasana hisy olona mamoy ny ainy akory vao hikoropaka hanao izany.

Laurena Nany