Tsy mitsahatra ny mamono olona ny varatra ka tamin’ity indray mandeha ity, olona efatra no indray maty tany amin’ny distrikan’i Mananara avaratra, ny alahady lasa teo. Marihina fa fianakaviana iray ireo namoy ny ainy ireo. Avy be ny orana tamin’io andro io narahina tselatra sy kotroka mafy. Tao an-trano niresadresaka ny fianakaviana no tampoka teo nisy tselatra sy zavatra nidoboka mafy. Ireo olona efatra ireo noho izany no nilatsahany ka teo no ho eo dia tapitra ny ain’izy ireo.

Vao tsy ela izay dia telo mianaka ihany koa no maty vokatry ny filatsahan’ny varatra, tao an-tampon-tanànan’Ambositra, fokontany Ambohimanjaka. Raha tsiahivina dia avy niava vary izy ireo ary nahandro sakafo avy hatrany nony  tonga tao an-trano ka nandritra izay fotoana izay no nirefotra ny varatra. Maty tsy tra-drano ny ramatoa iray sy ny zanany iray raha toa ka tany amin’ny hopitaly no namoy ny ainy ny iray hafa.

L.N