« Afa-doza izahay aty amin’ny sisiny atsimon’ny faritra Amoron’i Mania fa maty ilay dahalo raindahiny antsoina hoe Sahala raha nangalatra omby miisa 89 niaraka tamin’ny namany miisa 60 nirongo basy mahery vaika, ny 14 Janoary lasa teo, tao Ambohimilanja sy Soatanana, distrika Manandrina », araka ny fampitam-baovao voaray avy any an-toerana. Raha tsiahivina dia nirefodrefotra  ny basy tamin’ny nidiran’ireo dahalo tao amin’ireo tanàna roa ireo, tokony tamin’ny 11 ora atoandro. Nisy ireo nandositra avy hatrany raha vao nahita ireo olon-dratsy fa nisy kosa ireo sahy nanohitra saingy be noho ny vitsy ka dia niala maina ireo fokonolona. Nisy mihitsy moa ireo namoy ny ainy  nandritra izany fifandonana izany.

Zandary 3 sy fokonolona 250 nanao ny fanarahan-dia

« Raikitra ny fifampitifirana teo amin’ny zandary miisa 03 sy ireo dahalo izay nampian’ireo fokonolona miisa 250 eo ho eo ka tamin’izany no nahalavo an’i Sahala sy ny namany iray. Tafaverina avokoa ireo omby », araka ny fanampim-baovao. Aiza daholo ireo zandary sy miaramila natao hisahana ny tsy fandriam-pahalemana any amin’iny toerana iny ? Sanatria ve ireo manam-pahefana telo ireo ihany no mifehy io tanàna io. Tsikaritra mantsy fa ireo fokonolona natao arovany indray no maro an’isa noho ny mpitandro filaminana amin’ny fanoherana ireo olon-dratsy. Tokony asiana fiheverana ihany ny toy izao.

L.N