Fahoriana no mahazo ireo mpamily sy mpandeha any amin’iny lalam-pirenena Rn6 iny rehefa fahavaratra toy izao amin’ny afitsoky ny oram-baratra, raha fifaliana kosa ho an’ireo vatan-dehilahy monina eny Tanetilava, amin’izao fahatapahan-dalana izao. Lasa fitadiavam-bola ho azy ireo ny mampita fiara eo amin’ny « radier ». Araka ny loharanom-baovao 20 000 ariary ka hatramin’ny 150 000 ariary ny saran’ny fampitana fiara iray ao an-toerana.

Marihina fa misy ihany ny tetezana ao Tanetilava saingy efa dibo-drano ka tsy afaka ampiasaina intsony. Voatery miandry hatrany amin’ny adiny fito ireo mpitatitra vao midina ny rano ary amin’izay vao afaka miampita, izay tsy maintsy sarihin’ireo vatan-dehilahy matanjaka ireo ny fiara iray, raha lakam-by kosa no hitaterana ireo mpandeha izay mianto-tena tsirairay ankoatra ny saran-dalana izay efa mahazatra, araka ny loharanom-baovao hatrany. Manoloana ity fijaliana mahazo ireo mpampiasa ity lalana ity isaky ny fotoam-pahavaratra tahaka izao dia miantso ny ministeran’ny Asa vaventy mba hijery akaiky izao fahoriana mahazo azy ireo izao.

Laurena Nany