Mitady hahazo vahana ny tsy fandriampahalemana any amin’ny distrikan’i Sambava. Nitrangana fanafihana mitam-basy mantsy tao an-tampon-tanàn’izany toerana izany, ny alin’ny alatsinainy lasa teo, tokony ho tamin’ny misasak’alina. Magazay lehibe « grossiste » iray ao Antanifotsy no notafihin’ny jiolahy dimy lahy nirongo basy poleta vita gasy. In-efatra nanapoaka basy ireto jiolahy ireto ampitahorana ny mponina, ka lasa tamin’izany ny vola be 1 miliara ariary sy entana tao amin’ilay magazay.

Marihina fa fanafihana mitam-basy magazay fanindroany izao no nitranga tany Antanifotsy io. Vao roa volana mahery izay dia nisy nanafika  ihany koa io tanàna io ka nahafatesana vehivavy mpitam-bola iray sy naharatrana hafa koa.

Amoron-dalana avokoa ireo toerana roa  voatafika ireo fa ny tena mahalasa saina sy mahasorena ny mponina amin’ny mpitandro filaminana  any an-toerana dia tsy hita mihitsy ireto farany vao misy trangam-panafihana tahaka izao. Sanatria ve lasa fanjakan’ny baroa ny eto Sambava ? Hoy ny loharanom-baovao.

Laurena Nany