Rangahy be iray no nosamborin’ny mpitandro filaminana, tany an-tampon-tanànan’i Manakara, ny alarobia lasa teo fa saika hangala-jaza. Tsy tao an-trano ny ray aman-drenin’ilay zaza ka ny renibeny no nitaiza azy ka nentiny nandehandeha ny zafikeliny izay vao telo taona monja. Tamin’izay indrindra anefa dia tonga avy any ity lehilahy lehibe ity nisintona ilay zaza teny an-tananan’ilay ramatoa be, manoloana indrindra ny toerana famonoam-biby sady nanambana sabatra azy. Lasany noho izany ilay zaza ary vaky nandositra izy io avy eo. Niantso vonjy avy hatrany ilay renim-pianakaviana ka raikitra ny fanenjehana an’ilay rangahy, izay tsy lasa lavitra dia tratran’ny fokonolona niaraka tamin’ilay zaza. Naverina tamin’ny renibeny ilay tsy manan-tsiny avy eo fa ilay mpangala-jaza kosa natolotra ny mpitandro filaminana any an-toerana. Mbola tsy fantatra kosa ny antony nahatonga ity lehilahy lehibe ity hanao izao fihetsika hafahafa izao. Mandeha ny famotorana.

L.N