Misy mametraka vato be indray amin’iny lalam-pirenena Rn2 iny rehefa alina ny andro. Taksiborosy iray marika Mercedes Sprinter mampitohy ny Renivohitra sy Toamasina no tratran’izany ny alin’ny alakamisy hifoha zoma lasa teo, rehefa nanakaiky ny tanànan’i Brickaville. Vato lehibe miisa 3 no nalahatra teo amin’ny arabe izay tsy nampoizin’ny mpamily mihitsy. Araka ny fanambaran’ity farany dia efa mateti-pitranga izany fa niova toerana izany vato izany izay nahatonga azy nidofotra tamin’izany. Simba nandritra izany ny « ventilateur pales » an’ilay fiara. Tsy asan-jiolahy ilay izy fa fanahy iniana ataon’ny olona ratsy fanahy eny an-toerana. Porofon’izany dia naharitra 30 minitra teo izy ireo nanamboatra ilay fiara fa tsy nisy trangan-javatra hafahafa niseho.