Nirongotra tao ho ao ny halatra lakolosy. Noho ny filana sy fitadiavana dia lasa havadika ho vola indray ny lakolosim-piangonana noho izy vita amin’ny varahina. Ankoatra ny tranga izay niseho tany amin’ny distrikan’i Belo ambonin’i Tsiribihina tamin’ny faramparan’ny volana janoary lasa teo dia tonga any amin’ny distrikan’i Miandrivazo indray izany. Araka ny loharanom-baovao voaray dia ripaka avokoa ireo lakolosy amin’ireo fiangonana katolika any ambanivohitr’i Miandrivazo amin’izao fotoana izao. Hatreto dia lakolosy miisa 6 no efa lasa. Mihanika tilikambo mihitsy ireo jiolahy mangalatra izany fitaovam-piangonana izany.

Manoloana ny firongatr’ity trangan-javatra mampalahelo ity dia niangaviana ireo kristianina tany  an-toerana mba hampirina ireo sisan’ny lakolosy tsy lasan’ireo mpangalatra any an-tranony avy saingy tsy nety izy ireo fa natahotra ny hidiran’ireo olon-dratsy an-keriny ka ho voatifitra. Nandray fepetra noho izany ny tompon’andraikitra nampiakatra ireo lakolosy ireo ao an-tampon-tanàn’i Miandrivazo.