Taolam-paty miisa 26 no hitan’ny olona, tao amin’ny tanàna antsoina hoe Manantohatra, fokontany Antanambao, kaominina Fanandrana, any Toamasina faharoa, ny zoma 12 febroary lasa teo. Tonga teny amin’ny biraon’ny zandary ny lehilahy iray, tokony tamin’ny 9ora sy sasany tany ho any nampilaza azy ireo ny fisian’ireo taolam-paty ireo tamin’io tanàna voalaza etsy ambony. Nidina teny an-toerana avy hatrany ireo zandary niaraka tamin’ny tompon’andraikitra ny Bmh nijery izany ka araka ny fizahana natao dia avy amin’ny razana miisa 3 ireo taolana ireo, ka miisa 11 ny taolan-dava raha toa ka mahatratra 15 ny taolana madinika.  Rehefa natao anefa ny fanadihadiana dia nilaza ho tsy naheno sy tsy nahitana vaky fasana mihitsy tany an-toerana tato ho ato. Tombanana ho narian’olona teo amin’io tanàna io noho izany ireo taolana ireo rehefa tsy nahitana mpividy. Nandray andraikitra kosa ireo fokonolona nandevina ireo taolam-balo teny amin’ny fasam-bahiny. Misokatra ny fanadihadiana.

L.N