Tovolahy iray no saika nanaparan’ny fokonolona ny hatezerany, tany Toamasina, ny alatsinainy lasa teo. Nangalatra solosaina enti-tanana iray tao amin’ny magazay  teny akaikin’ny lapan’ny tanàna izy io no tsikaritry tompon’ny entana, raha nivoaka ilay toerana. Nandositra tao anaty Bajaj nijanona manoloana ilay magazay ilay mpangalatra no nenjehen’ny tompon’ny entana sy ny fokonolona ka noraisim-potsiny rehefa tonga teny amin’ny hopitaly kely.

Soa fa nisy polisy teo ka afa-doza ilay tovolahy, raha nikasa hikasin-tanana azy ny fokonolona. Ankoatra ilay solosaina enti-tanana dia mbola nahitana fitoeran’izany miisa 2 hafa teny aminy. Efa fanaony  ny mangalatra itony karazana solosaina itony, araka ny angom-baovao voaray. Efa betsaka ihany koa ireo olona mitaraina very izany, na ao anaty « cyber » na any an-dalana na anaty magazay ka ity lehilahy ity no voalaza fa tompon’antoka amin’izany. Naverina tamin’ny tompony ny entana. Niaiky ny heloka vitany ihany koa ranamana nandritra ny famotorana azy. Efa eo am-pelatanan’ny polisy ny raharaha.

Laurena Nany