Rangahy iray sahabo ho 50 taona eo ho eo no namoy ny ainy tao anaty taksiborosy. Avy tany Toamasina hihazo an’Antsirabe no nitranga ny tantara mampalahelo. Tsy nisy nanam-po ny zavatra niseho. Ny rehetra nieritreritra fa mbola matory izy  io satria miankina tsara amin’ny fitaratra ny fiara ny lohany kinanjo efa maty ilay rangahy.

Nony tonga tao amin’ny fiantsonan’ny fiara tany Antsirabe mantsy ilay taksiborosy nitondra azy, omaly maraina, dia nidina avokoa ireo mpandeha rehetra fa ilay raim-pianakaviana irery ihany no mbola tavela tao anaty fiara. Niezaka namoha azy io ny mpanampin’ny  mpamily,  kanjo olona efa tsy miaina intsony ity manoloana azy. Vao nokitihany mantsy ilay rangahy dia nironjona fotsiny ny vatany. Nisahotaka ireo olona tany an-toerana indrindra ilay mpandeha nanakaiky ity rangahy ity. Raha nojerena ny entany dia tsy nahitana taratasy hamantarana azy mihitsy. Ireo olona teny an-toerana raha teo nilaza fa tsy misy mahafantatra azy.

Nampandre ny tompon’andraikitra ny Bmh any an-toerana, noho izany, ny fokonolona. Ahiana ho fijanonan’ny fo tampoka no nahafaty ity lehilahy, raha ny fizahana natao. Naterina tany amin’ny tranom-paty ao Antsirabe ny razana mandra-pahatonga ny fianakaviany haka azy.

Laurena Nany