Nisehoana lozam-pifamoivoizana nahafatesan’olona indray teny amin’ny lalam-pirenena  faha 2 iny ny alatsinainy lasa teo. Lehilahy iray nitondra môtô marika Honda no namoy ny ainy rehefa nifandona tamin’ny kamiao « semi-remorque », teny Ambatolaona Andrefana, fokontany Bevia, kaominina Ambatolaona, distrikan’i Manjakandriana, tokony tamin’ny 4ora sy sasany hariva. Nandeha mafy be tao anaty fiolanana sady fiakarana ilay nitondra kodiaran-droa, teo amin’io toerana voalaza io, raha nipoitra tampoka ilay kamiao, araka ny loharanom-baovao. Tsy nahafehy ny familiana intsony, noho izany, ilay mpitondra môtô ka nifandona tamin’ilay kamiao. Vokany, naratra mafy ilay lehilahy izay nifatratra tamin’ilay fiara vaventy ka nentina haingana namonjy ny hopitaly tao Manjakandriana. Nony tonga kelikely tao anefa dia tsy tana intsony ny ainy. Potika ihany koa ilay kodiaran-droa raha tsy dia nisy fahasimbana firy ilay kamiao. Notazomin’ny mpitandro filaminana kosa ilay mpamilin’ny kamiao natao famotorana.