Taorian’ny fitarainana sy antso avo amin’ireo manam-pahefana nataon’ny mponina any Sambava manoloana ny tsy fisian’ny trano fivoahana sy fidiovana ara-dalàna ao amin’ny hopitaly Besopaka dia nandray ny andraikiny i Zoky Vonjy, depiote voafidy ao an-toerana hanamboatra Wc manara-penitra ao amin’izany hopitaly izany. Efa nanomboka omaly ny asa fanamboarana ary ho voavaha tsy ho ela ny olan’ireo mitsabo sy ny marary ao amin’izany toeram-pitsaboana izany. Tsy hijanona amin’ny fanamboarana ihany fa handray zazavavy miisa 16 ihany koa ny solombavambahoaka hiasa hanadio ny hopitaly isan’andro mba tsy ho maimbo intsony.

Raha tsiahivina dia voatery mandeha eny ankalamanjana ireo marary rehefa hivoaka noho ny tsy fananan’ity hopitaly ity trano fidiovana sy fivoahana manara-penitra. Na ireo olona avy misedra fandidiana rehefa hiseka sy ireo hakana rà dia tsy maintsy mivoaka ety ivelany mitady toerana hivoahana sy hidiovana. Ho nofy sisa ireo olana nampanahirana ireo mararin’ity hopitaly ity.

L.N