Feno telopolo taona ny vondrom-panabeazana Aceem teo  amin’ny  sehatra fanabeazana ny tanora. Nosokafana tamin’ny fomba ofisialy, omaly, teny amin’ny Ekar Faravohitra ny fankalazana izany fotoan-dehibe izany, izay niarahana tamin’ny filoha Ratrema William, ireo mpanabe ary indrindra ireo mpianatra. Raha fanampim-pampianarana no niaingan’ny Aceem dia efa nanangana sekoly maro izy amin’izao fotoana izao.

Ary ny hanatsara hatrany ny asa iandraketany no tanjon’ity vondrom-panabeazana ity ka ny  zavatra voizina amin’izany dia fanabeazana ara-tsaina mba ho olom-banona ireo mpianatra mivoaka ao aminy. « Hanao ezaka amin’ny lafiny fampianarana ny vondrom-panabeazana Aceem mba ho tsara sy hanara-penitra hatrany. Mba ho andry iankinana hampandroso ny firenena ireo mpianatra mivoaka ato amin’ny Aceem fa tsy hanodina ny harem-pirenena », hoy ny filoha Ratrema William.

Mba hanatsarana hatrany ny lafiny fampianarana dia mila misokatra amin’ny teny malagasy fototra ny fampianarana fa tsy aorina amin’ny tenin’ny hafa, hoy hatrany ity filohan’ny Aceem ity. « Tokony tenin-drazana no ampiasaina raha te-hahomby amin’ny fampianarana satria misy fiantraikany amin’ny ho avy ny ankizy malagasy raha tsy mahafehy akory ny teny malagasy izy ireo. Ary tokony hirehareha amin’ny teniny ny mpianatra malagasy. »

L.N