Tovolahy tsy ampy taona miisa 3 no tratran’ny polisy teny Antaninandro, teo am-panglarana finday. Ny alarobia teo, tokony tamin’ny 6ora sy sasany hariva, no nitrangan’izany, teny Ankadivato. Nikiakiaka niantso vonjy sady nanenjika azy telolahy ny olona iray norobain’izy ireo ilay finday. Tsy nampoizin’ireto tovolahy anefa fa nisy mpitandro filaminana tsy lavitra teo ka noraisim-potsiny izy ireo. Nentina haingana teny amin’ny biraon’ny polisy eny amin’ny boriborintany faha-3 izy ireo natao famotorana. Nandritra ny fakana am-bavany azy ireo no nilazany fa tsy nanam-bola atao fidirana ao amin’ny « Bal des jeunes » iray eny an-toerana no nahatonga azy ireo hangalatra io finday an’olona io. Marihina fa mbola 16 taona avy izy telolahy ireo. Efa tafaverina any amin’ny tompony kosa ilay finday. Izy ireo kosa natolotra ny fampanoavana omaly.