Tovolahy iray no naratra mafy rehefa niharan’ny fitsaram-bahoaka, teny amin’ny 67ha, omaly maraina. Nanendaka finday-na ramatoa iray teny an-toerana izy io no notsarain’ny mponina teny ihany. Handeha hamonjy fivavahana vao maraina, ity lasibatra, sady miresaka amin’ny olona amin’ny finday raha nosintomin’ity olon-dratsy ity izany fitaovana izany. Nikiakiaka niantso vonjy avy hatrany ilay vehivavy ka raha vao nahita izany ireo lehilahy teny an-toerana dia nihazakazaka nanenjika ilay mpanendaka.

Tsy lasa lavitra dia tratra ity farany ka niharan’ny fitsaram-bahoaka avy hatrany. Naratra mafy ny tarehin’ilay mpanglatra sady nijininika ny rà. Nivonto be ny molony ary mila tsy hisokatra intsony ny masony vokatry ny daroka sy vono nihatra taminy. Navelan’ireo lehilahy nandeha ilay jiolahy avy eo rehefa reraka  ny nidaroka azy fa tsy niantsoana mpitandro filaminana. Naverina tamin’ny tompony kosa ny finday-ny avy eo.

L.N