Nosokafana tamin’ny fomba ofisialy, ny sabotsy 27 febroary lasa teo, ny toeram-pialam-boly Maitsoririnina, eny Ankaditapaka avaratra. Toerana izay natokana ho an’ny ankizy sy ny tanora ary olon-dehibe mba ahafahana miala voly, izay mikendry ny hanolotra ireo mponina sy ireo mpitsidika tontolo iainana tsara kokoa, famoronana fitaovana sosialy iombonana ao amin’ny tanànan’Ankaditapaka. Hitao ao avokoa ny toerana fanaovana « Skatepark » sy trano fisakafoanana, fanaovana fanazaran-tena, toy ny « judo sy karaté ». Entina nanamarihana ny fanokafana ny toeram-pialam-boly dia nisy ny fampisehoana nataon’ireo tanora maro ka anisan’izany ny filalaovana ny « Skatepark », ny « cheerleading »  sy ny maro hafa.

Ny toeram-pialam-boly Maitso ririnina dia natao hanazarana ireo ankizy sy tanora mifaninana mba ialana amin’ny resaka kolikoly satria rehefa zatra mifaninana izy ireo, lasa manana famoronana ka miala ho azy ny kolikoly, hoy i Gabriel Harison, filoha lefitry ny ben’ny tanàna an’Antananarivo. Marihina fa misy fandraisana anjara ny fialamboly sasany ao amin’ny Maitsoririnina ary afaka manao famandrihana isam-bolana ihany koa ireo mpanjifa ka 7 tapitrisa isan-taona no vola ezahina ho voaangona izay miditra amin’ny kitapom-bolan’ny kaominina. Mahatratra any amin’ny 3,5 miliara Fmg no nanaovana ireo foto-drafitr’asa ireo ary tsy hijanona eo fa ezahina aparitaka eto an-drenivohitra ka eny Antanimbarinandriana, eny Anosy, no eritreretina ny asa manaraka.Marihana fa ny toeram-pialam-boly Maitso ririnina dia niarahan’ny kaominina Antananarivo sy ny « île de France » namolavola, tamin’ny alalan’ny IMV.

L.N