Voay be iray no hitan’ny fokonolona tao amin’ny rano mivondrona, tao Ambatoloaka, Nosy Be Hell-Ville, ny sabotsy lasa teo. Taitra ireo mponina vao nahita ity voay ity satria araka ny filazan’izy ireo dia tsy mivoaboaka fotsiny amin’izao ireny voay ireny.

Nofatorana noho izany ilay biby niandry ny fanapahan-kevitra ny tompon’andraikitra tao an-tanàna. « Fambara loza na misy fomba tokony alamina aty amin’ny tanànan’i Nosy Be Hell-Ville fa tsy misehoseho tsotra izao ireny voay ireny. Tanàna masina ny tanànan’i Nosy Be ary be fady mihitsy. Mety nisy olona nanota fady noho izany any ho any ka nahatonga ity voay ity niseho. Tokony mahatsapa-tena ireo olona nanao ny tsy mety ary manatona ny Ampanjaka atao fombafomba hanadiovana azy fa raha ts’izany dia hisy loza hiseho eto Nosy Be », hoy ny loharanom-baovao avy any an-toerana.

Marihina fa tsy vao izao fa efa matetika misy tranga tahaka izao any an-toerana. Tsy novonoina noho izany ilay voay fa nandrasana ny ben’ny tanàna tany an-toerana ary naverina tany anaty rano avy eo.