Nanapatra ny heriny indray ireo dahalo, tany amin’ny distrakan’i Belo ambonin’i Tsiribihina, ny faran’ny herinandro teo. Dahalo maherin’ny dimampolo nirongo basim-borona miisa 31 sy fitaovam-piadiana maranitra no tonga masiaka nandroba ny fananan’ireo fokonolona, tao amin’ny tanànan’Ampilira Ankilimahasoa, fokontany Bemangily, kaominina Ankalalobe, tokony tamin’ny 6ora sy sasany maraina. Mbola teo am-pikarakarana ny tao an-trano indrindra ireo mponina tao amin’ity tanàna ity no nisy tifitra variraraka nanaitra azy ireo. Vaky nandositra ny iray tanàna vao naheno izany ka nilamina tsara ireo dahalo nangalatra ireo omby ary lasa tamin’izany ny biby miisa 130. Tsy nijanona tamin’ireo omby ihany anefa fa mbola nataon’izy ireo takalon’aina ny olona telo dia zaza menavava sy ankizy 4 taona ary vehivavy iray.

Dahalo dimy lavon’ny balan’ny zandary

Nampandre ny mpitandro filaminana avy hatrany ireo fokonolona vao niala ny tanàna ireo olon-dratsy. Tsy nampoizin’ireto farany anefa fa tonga dia namonjy ny kizo fieren’izy ireo ny mpitandro filaminana sy ny fokonolona nanao ny fanarahan-dia. Tokony ho 1 kilometatra niala ny tanàna izay lalana tsy maintsy lalovan’ireo dahalo ireo ka raikitra ny fifandonana, adina iray taty aoriana. Dahalo miisa 5 no lavon’ny balan’ny zandary nandritra ny fifampitifirana ary fito hafa naratra mafy. Fokonolona iray ihany koa naratra. Tafaverina kosa ireo omby rehetra sy ireo olona telo natao takalon’aina.

Laurena Nany