Nipoapoaka ny basy teny Itaosy, ny alin’ny talata hifoha alarobia lasa teo, nandritra ny  fanafihana mitam-piadiana nataon’ny andian-jiolahy misaron-tava. Am-polony izy ireo nirongo basy mahery vaika sy sabatra nanafika ny tokantranon’ny olona iray teny an-toerana. Araka ny loharanom-baovao, rehefa avy nianika ny fefy mbola niakatra koa  ny rindran’ilay trano ireo jiolahy mba hahazo ny rihina voalohany. Nony tonga teo indray dia novakian’izy ireo avy hatrany ny varavarana fitaratra mba ahafahany miditra ary nandrahona ny tompon-trano tsy hanao fihetsika mahery fa raha tsy izany dia ho vonoina. Tahotra ny ho faty dia samy nanaraka ny sitrapon’ireo olon-dratsy ny iray trano ka lasa ny vola mitentina 10 tapitrisa ariary, solosaina enti-tanana miisa 2, firavaka volamena ary finday avo lenta miisa 5. Tsy nikasin-tanana ireo lasibatra mihitsy ireo jiolahy fa lasa nandositra rehefa nahazo izay nilainy. Ahiana ho olona mahafantatra ireo lasibatra ihany koa ireo olon-dratsy ireo, araka ny loharanom-baovao hatrany.

Laurena Nany