Mitohy hatrany ny fandrobàna fananan’olona ataon’ireo dahalo any amin’ny faritra Matsiatra ambony. Nisehoana fanafihana indray tany Ampandrambato, fokontany Betsara, kaominina Morafeno, distrikan’Ambohimasoa, ny 01 martsa teo, tokony ho tamin’ny 10ora alina . Nirefodrefotra ny poa-basy nataon’ireo olon-dratsy miisa 10 nirongo basim-borona sy fitaovam-piadiana maranitra nentina nampihorohoroana ireo fokonolona. Samy namitsaka tao an-tranony tsy nisy sahy nivoaka nanohitra azy ireo mantsy ny mponina ka nigalabona izy ireo naka ny omby tao ambalan’ny olona iray tao an-tanàna. Lasa ny omby miisa 4 ary mbola nanapoaka basy hatrany ireo dahalo rehefa nivoaka ny tanàna. Lasa kelikely izy ireo vao sahy nirohotra nivoaka ny trano ireo vatan-dehilahy ary nampandre ny mpitandro filaminana.

 Laurena Nany