Nitrangana lozam-pifamoivoizana indray tany amin’ny lalam-pirenena RN2, ny alin’ny alakamisy hifoha zoma teo tokony ho  tamin’ny 1ora sy 15 minitra maraina tany ho any. Kamiao lehibe roa samy mitondra « conteneurs » no nifandona, tany amin’ny tanàna atao hoe Ambohikambana, izay 88 kilometatra tsy hiditra ny tanànan’i Brickaville  raha avy aty an-drenivohitra. Tsy nisy ny aina nafoy fa iray tamin’ireo mpamily no naratra voa teo amin’ny tongony nefa naharitra ora roa nakana azy tao anatin’ilay fiara, araka ny loharanom-baovao.

Niteraka fitohanana teo amin’ireo fiarakodia, nampiasa ny lalam-pirenena RN2 iny ity lozam-pifamoivoizana ity satria voabahana tanteraka ny lalana, hany ka, voatery namorona fiolanana ny fiara kely rehetra fa ireo fiara lehibe kosa tsy maintsy niandry. Niteraka fahasorenana  ho an’ny maro ny fitohanana izay naharitra ora enina. Tamin’ny 7ora sy sasany maraina vao afaka ny fitohanana tao raha tamin’ny 1ora sy sasany izy ireo no nigadona teo an-toerana.

L.N