Noraisim-potsiny teo am-panendahana ireto roalahy ny faran’ny herinandro lasa teo, teny Analakely. Saika nanendaka olona nidina nihazo an’iny Roxi iny ireo olon-dratsy ireo izao tratra izao. Araka ny vaovao voaray dia telo lahy izy ireo no mody nitakoko miaraka amin’ireny sarimbavy ireny ary nipoitra tampoka rehefa nahita ireo olon-droa nandeha an-tongotra nikasa handroba ireto farany. Nanohitra nikiakiaka niantso vonjy ny iray tamin’ireo lasibatra ary soa fa nisy an’ireny mpiambina teny amin’ny manodidina ireny nanavotra azy ireo. Vaky nandositra ireo olon-dratsy raha vao nahita ny fahatongavan’ireo mpiambina. Tsy lasa lavitra akory anefa dia voasambotra ny roa tamin’izy ireo raha toa ka tafaporitsaka ny fahatelo. Nentina avy hatrany teny amin’ny biraon’ny mpitandro filaminana akaiky teo ireo mpangalatra ary mbola tratra teny ny fitaovana entiny manao ny asa ratsy. Nahitana vola sy finday ihany koa tany amin’izy roa lahy ireto nandritra ny famotorana. Fantatra nandritra ny fanadihadiana ihany koa fa manana akanjo maromaro izy ireo hifanoloana mandritra ny fanendahana mba tsy hahatratrarana azy ireo.

L.N