Tratra ny tanjona amin’ny famongorana ny aretina lefakozatra eto Madagasikara, manoloana ny tsaho sy ny fandavana ataon’ny ray aman-dreny sy ny mpampianatra eny amin’ny sekoly tsy miankina. Tamin’ny volana aprily 2015 dia  98% ny zaza malagasy no vita vaksiny miaro amin’ity aretina ity. Noho izany, tombanana ho vita vaksiny avokoa ireo mpianatra eny amin’ny sekolim-panjakana sy ny tsy miankina manerana ny Nosy amin’ity andiany fahafito ity. Mba hahatratrarana izany tanjona izany, nanantanteraka fivoriana fampahafantarana ny amin’io aretina io ny ministeran’ny Fanabeazam-pirenena izay niarahana tamin’ny ministeran’ny Fahasalamam-bahoaka, ireo tale nasionaly ary ireo tompon’andraikitra avy amin’ny sekoly tsy miankina, teny amin’ny Dlc Anosy, omaly.

Hisy noho izany ny fanentanana hanombohona ny asa izay ataon’ireo tompon’andraikitra eny anivon’ny sekoly rehetra satria betsaka ireo ray aman-dreny misalasala tratran’ny tsaho. Andraikitra efa noraisin’ny ministeran’ny Fanabeazam-pirenena rahateo ny hiaro ny ankizy rehetra satria mety mitondra areti-mandoza ho an’ny zaza manerana ny Nosy ny fisian’ny zaza tsy vita vaksiny na dia iray aza.

« Tafiditra amin’ny ady atao amin’ny lefakozatra ny fianakaviam-ben’ny fanabeazana. Efa hatramin’ny fiandohan’ny fampielezan-kevitra no nanentana ny sekoly na miankina na tsy miankina amin’ny fanjakana izahay ary tsy hitsahatra raha tsy fongana tanteraka ny eto Madagasikara », hoy i Rabeandalana Sandrot, Tale misahana ny maha olona eo anivon’ny ministeran’ny Fanabeazam-pirenena.

L.N