Nitrangàna habibiana tsy roa aman-tany indray tao an-tampon-tanàn’Antsirabe. Niharan’ny filan-dratsin’ny talen-tsekoly tsy miankina iray ao Velodrome, ny 27 febroary lasa teo, ny zazavavy kely iray vao 13 taona monja. Tsy nijanona teo fa mbola nogiazany tao an-tranony tsy nahazo nivoaka  nandritra ny efatra andro ihany koa ilay tsy manan-tsiny. Gaga ny ray aman-dreniny raha nahatsikaritra fa tsy nody ilay zaza nandritra izay andro maromaro izay ka nametraka  fitairanana teny amin’ny mpitandro filaminana izy ireo. Nandeha ny fanadihadiana ka sarona tao an-tranon’ilay talen’ny sekoly ianarany ilay zaza.

Manana olana amin’ny vadiny ilay tale ka monina irery ao amin’ny faritra ny sekoly ihany izy, araka ny vaovao voaray. Nosamborina avy hatrany ilay mpanolana ary nentina natao fanadihadiana teny amin’ny biraon’ny manam-pahefana.  Nandritra ny fakana am-bavany azy no nahafahana nisambotra olona telo hafa izay niray tsikombakomba taminy. Niakatra fitsarana ny herinandro teo ny raharaha ary notazomina am-ponja vonjimaika ireo olona efatra voarohirohy.

Manoloana ity trangan-javatra mampalahelo ity dia maro ireo olona any an-toerana mangataka ny fanakatonana ity sekoly tsy miankina ity satria tena malaza ratsy amin’ny fampisotroana toaka ireo mpianatra .

Laurena Nany