Azo lazaina fa efa eran’ny Madagasikara ny fitsaraham-bahoaka amin’izao fotoana izao. Aleon’ny fokonolona mitsara ireo olon-dratsy amin’ny fahaizany azy sy  tsy mamela mihitsy raha tsy manaraka hatramin’ny aina toy izay ny mandre ny fanapahan-kevitra ny mpitandro filaminana. Tahaka ny nahazo ny tovolahy roa tany Nosy varika, ny faran’ny herinandro teo. Nandroba vehivavy iray  no niantombohan’ny filan-dratsin’ireo jiolahy, ny talata 15 martsa lasa teo, tao amin’ny fokontany Fanivelona. Lasa ny vola 1,4 tapitrisa ariary. Tsy nijanona tamin’ny fandrobana anefa izy ireo fa mbola naolana ihany koa ilay lasibatra ary niafara tamin’ny fandatsahana aina azy izany. Nisy nahatsikaritra anefa ny fanaovan’ireo jiolahy izany sy ny nasian’izy ireo ny razana ka nampandre ny mpitandro filaminana avy hatrany ireo olona nahatazana ireo. Nosamborina rehefa avy eo ireo mpamono olona fa ny razana kosa natolotra ny fianakaviana taorian’ny fizahana.

Nirohitra nidina teny amin’ny biraon’ny zandary ny havan’ny maty rehefa vita ny fikarakarana ny momba ny razana. Niaraka tamin’ny antsy lava sy famaky ary lefona izy ireo ny faran’ny herinandro teo, nitaky ny hanaovana fitsaraham-bahoaka ireo mpanao ratsy. Tsy nety nanome moa ireo mpitandro filaminana saingy tsy nahatohitra ny herin’ny vahoaka ka lasan’ireto farany ireo roalahy mpanolana. Nentin’izy ireo tany amin’ny tetezana iray izay 4 kilometatra miala ny tanàna nanaovana fitsaraham-bahoaka izy mirahalahy ary tsy namelan’izy ireo mihitsy raha tsy maty tahaka ny havany.