Nanjavona tao an-trano ny volan’ny raim-pianakaviana iray, tany Ambatomanoina, Anjozorobe, ny faran’ny volana janoary lasa teo. Tovolahy iray 26 taona eo ho eo no voarohirohy ho nangalatra  izany. Lelavola mitentina iray alina sy efatra hetsy ity lasa ity, araka ny filazan’ny voaroba.

Nanararaotra ny fotoana nandehanan’ilay rangahy nivavaka ilay mpangalatra no niditra an-tsokosoko tao an-trano tamin’ny alalan’ny famakiana ny varavarana. Nametraka fitoriana tao amin’ny mpitandro filaminana tany an-toerana avy hatrany ny lasibatra. Fantatra tamin’ ny fanadihadiana fa tompon’antoka tamin’izany io tovolahy io. Nampanantsoina teny amin’ny biraon’ny zandary izy ary niaiky ny heloka vitany. Nambarany fa noho ny fahasahiranany no antony nangalarany izany satria tsy nomen’io rangahy io mihitsy izy raha nisambotra. Nilaza ihany koa izy nandritra ny fakana am-bavany azy fa vola kely ihany no saika halainy fa nihitatra indray izany vao nahita ireo lelavola be dia be tao anaty vata fasiana vola izy. Niakatra fampanoavana ny alatsinainy teo ny raharaha.

L.N