Tovolahy iray 24 taona nisarahan’ny olon-tiany no maty namono tena nihinana poizim-boalavo, ny alatsinainy lasa teo, tany Morarano Analankininina, Toamasina. Gaga ny fianakaviana niray trano taminy, fa vata-mangatsiaka no novantanin’izy ireo. Araka ny loharanom-baovao voaray, nanana olana tamin’ny sakaizany izy. Fototry ny adin’izy ireo ny hasarotam-piaro satria tratran’ilay tovolahy niaraka tamin’ny lehilahy hafa ny sakaizany.

Ny hisaraka aminy no valin-tenin’ilay tovovavy rehefa nangataka fanazavana tamin’ity farany ny tenany. Niezaka nanambitamby izy fa tsy norarahin’ilay sakaizany mihitsy ary niafara tamin’ny fifamaliana teo amin’izy ireo izany. Tsy nahafehy tena intsony satria nahatsiaro ho voadona mafy izy ka nikasi-tanana ilay olon-tiany.  Nanenina izy ka naleony nanapitra ny ainy fa izay no hitany fa mety. Taitra ny havany raha nahita azy tsy nisy aina intsony, ary mbola hita teny aminy ny fonosan’ny poizim-boalavo namonoany tena.

Laurena Nany