Rehefa natao ny velam-pandrika, tratra ihany ireo olona enina mpisandoka tanin’olona, teny amin’iny faritra Itaosy sy Alakamisy Fenoarivo iny. Efa tamin’ny taona 2014 izy ireo no nanomboka nanao ny asa ratsiny. Manao taratasy sy fitombokase hosoka amin’ny fivarotana sy fisandohana tanin’olona. Teny an-dalana hanao ny asa ratsiny izy ireo no saron’ny zandary teny Alakamisy Fenoarivo, ny andron’ny 18 martsa teo.

Araka ny fakana am-bavany natao azy ireo dia tadiavina ny taratasin’ny tany iray sy ny « acte de notoriété » mikasika io tany io. Mitady olona antitra iray indray raha efa izany, hanaovana karapanondro hosoka maromaro sy hamoronana « acte de vente » ary entin’izy ireo hamitahana ireo mpividy. Fitaovana iafenana ireo taratasy ireo rehefa misy ny fanenjehana. Tsy vao sambany akory izao fa efa matetika izy ireo no nanao io asa io ary iny faritra Atsimondrano iny no tena lasibatra.

Marihina fa mpitory iray nahazo fanomezam-baovao avy amin’ny tsara sitra-po no nahafahan’ny zandary nisambotra azy ireo, tany amin’ny trano iray teny Alakamisy Fenoarivo. Sarona nandritra ny fisavana ireo taratasy sy fitombokase hosoka maromaro an’ny sampan-draharaha samihafa ary galona kolonely maro.

Laurena Nany