Pasitera amina fiangonana zandriny iray no nosamborin’ny andrimason-pokonolona ao Antsahalalina, Kaominina ambanivohitra Ambohimalaza, distrikan’i Sambava, ny faran’ny herinandro teo rehefa nahatratrarana lavanila maitso. Andian’ankizy sendra nilalao teo an-tokontanin’Ingahy pasitera no nahita lavanila maitso niparitaka teny aminy, ka namepetra ireo ankizy mba tsy hiteniteny amin’olona izy. Tsy nahafehy volana anefa ireo zaza ka niparitaka ny feo ary tonga hatrany ampoton-tsofin’ireo andrimasom-pokonolona. Nidina teny amin’ny toeram-ponenan’ny pasitera ireto farany nanamarina ny trangan-javatra.

Efa mailo anefa ilay mpitarika fiangonana fa nanjavona ireo lavanila teo an-tokontany. Nahamahina ny olona izany ka niangavy an’i pasitera hamoha ny tranony ny solontenan’ny fokonolona mba hahafahana manao ny fisavana. Nahitana ampahana lavanila maitso tokoa tao an-tranony rehefa nojerena. Nosamborina ny tenany, nentina natao famotorana. Niangavy mafy anefa i pasitera mba tsy haterina any amin’ny mpitandro filaminana fa « tsy misy olombelona tonga lafatra eto ambonin’ny tany », hoy izy. Notazomin’ny andrimason-pokonolona izy, ka ny alatsinainy 4 aprily teo no natolotra ny mpitandro filaminana natao famotorana.

Laurena Nany