Nirefodrefotra ny poa-basy. Miverina amin’ny heriny indray ireo jiolahy any amin’iny distrakan’Ambohidratrimo iny. Tsena roa, tao amin’ny fokontany Fiadanakely, kaominina Mahitsy no indray lasibatra ny andian-jiolahy nirongo basy, ny fiandohan’ny herinandro teo, tokony ho tamin’ny misasak’alina. Valo lahy nitondra basy poleta vita gasy sy famaky ary sabatra no nanesy nanafika ireo tsena roa ireo. Nanambana basy ireo tao an-trano avy hatrany ireo olon-dratsy vantany vao tafiditra sady nandrahona hamoaka ny fananana. Mamy ny aina ary tsy ananam-piry ka nitolefika teo anatrehan’ireo mpangalatra izy ireo. Vokany, lasan’ireo jiolahy tamin’ny fivarotana voalohany, ny vola mitentina 500 000 ariary sy toaka iray « cageot » ary sigara telo karitosy. Lelavola 300 000 ariary sy finday iray kosa tamin’ny tsena faharoa. Tsy nisy ny aina nafoy na naratra fa efa lasa lavitra ireo mpandroba vao sahy nampandre ny mpitandro filaminana izy ireo. Misokatra ny fanadihadiana.