Tokantrano miisa 3 no indray nisy namaky ny alin’ny alatsinainy 4 aprily hifoha 5 aprily, tokony ho tamin’ny  1 ora maraina tany ho any, teny Ambodivoanjo Ivandry. Anisan’izany ny tranon’ny mpanao politika iray. Jiolahy miisa 5 nitondra antsy lavalela roa sy basy poleta ary « matrac » no nandravarava teny an-toerana tamin’izany fotoana izany. Toeram-ponenan’ny teratany vahiny iray, monina eny Andranobevava Analamahitsy no nidiran’izy ireo voalohany. Nofatoran’izy ireo ny mpiambina dia novakiany ny varavarana miditra ao an-trano ; nambanany basy ilay raim-pianakaviana sy ny zanany lahy. Nodarohan-dry zalahy avy eo izy mianaka ka naratra. Lasa tamin’izany ny finday miisa 3 sy ny vola ary « tablette » mitentim-bidy 6 tapitrisa ariary. Nifindra tamin’ny tranona mpanao politika iray teny Ivandry indray ireo olon-dratsy avy eo ary nandroba ny vola tao anaty « porte feuille » sy vatafahitalavitra fisaka.

Tsy nijanona teo anefa fa mbola nikasa hiditra an-keriny tao amin’ny tokantrano mifanila amin’ilay mpanao politika izy ireo saingy tsikaritry ny tompon-trano mialoha ka raikitra ny fiantsoana vonjeo. Rifatra nitsoaka ireo jiolahy ary nandritra ny fifanenjehena no tonga ny polisy. Vokany, noraisim-potsiny izy dimy lahy. Natolotra ny fampanoavana omaly 7 aprily ireo olon-dratsy taorian’ny famotorana natao.

L.N