Tsy lany hevitra fa mahita fika vaovao foana ireo mpianatra midoroka zava-mahadomelina. Tsy ny mpianatry ny Ceg toy ny mahazatra fa hatramin’ireo mpianatra amin’ny sekoly tsy miankina dia efa voasarika amin’ny fidorohana avokoa ary tsy mifidy hoe mahalahy na mahavavy intsony. Toy izay tranga hita, teny amin’ny sekoly tsy miankina iray, teny Ankadivato, omaly atoandro, tokony ho tamin’ny 11ora tany ho any. Nandrehitra sigara ireo tovovavy miisa 3 raha vao nivoaka ny vavahadim-pianarana. Rehefa tena nojerena akaiky anefa dia hita fa rongony saingy nasisika tao anatin’ireny sigara “good look” ireny ary mifandimby mifoka izy ireo. Lany ny iray dia nandrehitra hafa indray avy eo. Gaga daholo ny mpianatra tao amin’ilay sekoly sy ny olona nanatri-maso raha nahita azy telo mirahavavy satria efa tsy tahotra tsy henatra intsony fa eny an-dalam-be eny no manao fihetsika tsy mendrika tahaka izany. Nisy tamin’ireo olona nahita izany no tsy naharitra ka nampandre avy hatrany ny manam-pahefana mba handray ny andraikiny amin’ny tranga-javatra mampalahelo toy izao.

L.N