Naratra mafy sady may kila vokatry ny fipoahan’ny toaka gasy, tao anaty bidao ny tovolahy iray 26 taona, tany Antsahambaro- Sambava, ny zoma hariva lasa teo. Handeha hividy toaka tao amin’ny trano fivarotana iray izy.  Tamin’ny fitondran’ilay ramatoa mpivarotra afon-dabozia  haka ilay zava-mahadomelina no nipoaka izany  satria tsy nahazaka ny herin’ny afo.

Nisy nipitika avy hatrany tamin’ny fitafian’ilay tovolahy. Nisahotaka eran’ny trano sady nikiakiaka ity farany nanala ny akanjony. Nentin’ny hatairana diso tafahoatra ihany koa ka tsy nahita lalana hitsoahana intsony izy. Niditra indray tao amin’ny efitra nisy ilay  fipoahana izy ka vao maika may tao. Efa ny fokonolona no nanavotra azy vao tafavoaka tao ny tenany. Teo anatrehan’izany, vaky nandositra ilay mpivarotra ary tsy hita izay nalehany hatramin’izao.  Vokany, may tanteraka ny vatan’ilay tovolahy. Potika lasa lavenona tsy nisy noraisina ihany koa ilay toerana fivarotana toaka gasy.

Nifamonjena nentina tany amin’ny hopitaly mba hahazo fitsaboina sahaza azy ny naratra saingy namoy ny ainy ny alin’io ihany, tokony ho misasak’alina. Efa mandeha ny fikarohana ilay ramatoa mpivarotra.

Laurena Nany