Lehilahy iray 35 taona eo ho eo no saron’ny fokonolona nangalatra posy. Tao Andranomadio, any Toamasina no nitrangan’izany, omaly antoandro, tokony ho tamin’ny 3ora tany ho any. Teo am-panosehana ilay posy nivoaka ny tokontany  izy no nisy nahatsikaritra. Raikitra ny tabataba sy ny antso vonjy nataon’ny olona. Nisahotaka ny iray fokontany nanenjika ity lehilahy ity ka tsy lasa lavitra akory izy dia tratra niaraka tamin’ilay fitaovana. Nisy ireo olona izay efa leo ny asa ratsy ataon’ireo mpangalatra no nikasi-tanana avy hatrany ka nandratra azy. Tonga ara-potoana teny an-toerana ny manam-pahefana fa raha tsy izany, efa saika niharan’ny fitsaram-bahoaka izy, hoy ny loharanom-baovao. Naverina amin’ny tompony ilay posy fa ilay olon-dratsy kosa eo am-pelatanan’ny polisy.