Nipoapoaka ny feom-basy teny Andravoahangy, omaly, teo anelanelan’ny amin’ny 12ora sy 30 mn ka hatramin’ny 1ora antoandro. Telo lahy nilanja basy poleta no tonga masiaka nampihorohoro ny mponina teny an-toerana, tamin’ny fanafihana mpamongady iray. In-droa nipoaka ny basy ka ny voalohany tamin’ny fidirana ny tsena ary teo am-pandosirana kosa ny faharoa. Niparitaka samy nanavotra ny tenany ny manodidina raha toa ka nilavo lefona manoloana ireo olon-dratsy kosa ny lasibatra. Tampoka raha teo ny fahatongavan’ireo mpangalatra ka tsy nisy azo natao. Lasan-dry zalahy tamin’izany  ny vola iray baoritra, izay mbola tsy fantatra ny isany, niaraka tamin’ny entam-barotra maromaro.

Na dia nanaraka ny sitrapon’izy ireo anefa ilay mpivarotra dia mbola notorahina vato ihany izy mba hiala tao amin’izany tsena izany. Voa teo amin’ny lohany izy ka naratra mafy. Nidina teny an-toerana nanao ny fizahana ny polisy rehefa nampandrenesina ny zava-misy. Ny naratra kosa nentina nihazo ny toeram-pitsaboana. Misokatra ny fanadihadiana.

Laurena Nany