Mitohy hatrany ny asa ratsy amin’ny fanakanan-dalana ataon’ireo olon-dratsy any amin’iny lalam-pirenena Rn4 iny saingy nandamoka tamin’ity indray mitoraka ity. Tamin’ny zoma 15 aprily lasa teo, tokony ho tamin’ny 11ora alina, fiara kamiao iray no saika lasibatr’ ireo jiolahy, tany Betomendry, fokontany sy kaominina Anahidrano, distrikan’Antsohihy I. Araka ny vaovao voaray dia nasian’izy ireo sakana hazo mokonazy ny lalana fa tsy nahatana ilay kamiao satria mbola tafatsoaka ihany. Tsy nisy noho izany ny fahavoazana nahazo ireo tao anatin’ilay fiara fa nampandre ny mpitandro ny filaminana avy hatrany ny mpamily vao niala teo. Nidina teny an-toerana avy eo ny zandary miisa 6 nijery ifotony ny zava-nisy. Vao nahatazana ny fahatongavan’ireto farany ireo jiolahy dia vaky nandositra. Noesorina kosa avy eo ilay sakana ary nanao fisafoana teo amin’ny manodidina mandra-maraina ireo zandary.

L.N