Tsy androany na ho rahampitso no ho foana ny asan-dahalo any amin’iny tapany atsimon’ny Nosy iny. Mila ho isan’andro dia misy tranga hatrany any amin’iny toerana iny ary tsikaritra fa efa tonga tsikelikely any Fianarantsoa ity asa ratsy ity. Toerana antsoina hoe Amboditanimena, fokontany Ambatovory, any an-tampon-tanàn’i Fianarantsoa I no lasibatra ny dahalo mitam-basy, ny zoma lasa teo, tamin’ny 12ora sy 30 mn antoandro. Tsy nisy nahatsikaritra ny fahatongavan’ireo olon-dratsy fa tamin’ny fahanginana tanteraka no nanatontosana ny fangalarana. Lasa ny omby miisa 2 tao am-bala vao taitra ny tompony.

Nampandre ny mpitandro ny filaminana avy hatrany ity farany ary nidina teny an-toerana nanao ny fizahana ny manam-pahefana. Rehefa vita izany, niroso tamin’ny fanarahan-dia niaraka tamin’ny fokonolona izy ireo. Nifankatratra teo amin’ny kilometatra vitsivitsy ny roa tonta. Raikitra ny fifampitifirana ary vetivety dia nilavo lefona ireo dahalo. Niparitaka ireto farany fa tsy nahatohitra ny herin’ireo mpanara-dia. Vokany, namela ireo omby teo an-toerana izy ireo ka noraisin’ny tompony avy hatrany ny fananany. Mitohy kosa ny fanadihadiana.

L.N