Nihena iray indray ireo mpanao ratsy. Ombiasy iray no namoy ny ainy rehefa nitsapa ny herin’ny ody basiny. Ny sabotsy 16 aprily lasa teo, no nisehoan’ny loza, tany Masiakampy, izay tanàna eo amin’ny 30 km miala an’i Miandrivazo. Mpimasy tena malaza ao amin’ny tanàna misy azy raha ity lehilahy ity ary malaza fa mahay mihitsy amin’io sehatra iray io, araka ny loharanom-baovao. Izy no voalaza fa mpamatsy ody gasy ireo olon-dratsy mpanao fanafihana any amin’iny toerana iny izay mampitondra takaitra ireo mponina mihitsy. Niseho azy tsy andairan’ny bala mantsy ranamana ka nanaraka hatramin’ny ainy izany.

Nanambara izy alohan’ny nanaovana ity fampisehoana hafahafa kely ity fa tsy laitran’ny bala, noho ny herin’ny ody gasy amin’ny tenany. Nalainy ny basy ary nohamasininy amin’ny fomba fanaovany azy. Nataony tao am-bava avy eo ny vava-basy ary napoakany. Vokany, tsy nisy fomba namelomana azy fa maty teo no ho eo ilay lehilahy ary niparitaka hatramin’ny atidohany. Manoloana ity tranga hafahafa kely ity dia maro ireo olona any Masiakampy naneho ny hafaliam-pony ary milaza hoe « misimisia ny tahaka izao dia mihena tsikelikely ireo mpanao ratsy. »

Laurena Nany