Mitady hahazo vahana ny fanafihana mitam-piadiana any amin’ny distrikan’i Nosy-Be Hell-ville ary tsy mifidy ora izany fa na amin’ny andro antoandro aza dia tonga manafika ireo jiolahy. Toy ny nahazo ity teratany Frantsay, ny sabotsy antoandro, tamin’ny 2ora. Jiolahy roa tsy misaro-tava nitondra sabatra no nanafika ny tranon’io vazaha io, tany amin’ny fokontany Bemoka, kaominina Diego. Lasa tamin’izany ny vola mitentina 1,5 tapitrisa ariary. Nidina teny an-toerana nisian’ny fanafihana ny mpitandro filaminana nanao ny famotorana rehefa nampandrenesina izay zava-nitranga. Nandeha ny fikarohana taorian’izay ka lehilahy iray nampiahiahy no nosavaina avy hatrany ary nahitana vola mitentina 320 000 ariary teny aminy. Nosamborina ity farany sy nentina natao famotorana ary niaiky ny heloka vitany izy sady nanoro ilay namany. Ity farany izay mbola nahatratrarana lelavola 400 000 ariary ihany koa. Notazomina ao amin’ny borigady Dzamanjary izy roalahy ireo mandra-piandry ny fitsarana.

L.N