Niakatra fampanoavana ny sabotsy lasa teo, ireo telo lahy tompon’antoka tamin’ny fangalarana môtôn’ny polisy. Nidoboka vonjimaika, eny Antanimora ny roalahy taorian’ny fihainoan’ny mpitsara azy ireo. Raha tsiahivina, môtô skotera marika Jog Pro 90 ity nisy nangalatra ity, nanoloana ny Casino iray eny Ambodifilao, ny 19 aprily, tamin’ny 6 ora hariva. Rehefa nojerena tamin’ny “camera de surveillance” tao amin’ilay Casino dia hita ny lehilahy iray nanao “casquette” sy akanjo maillot misy soratra “Fly emirates” eo anoloana sy “Cavani 9” ao an-damosina. Io akanjony io ihany avy eo no nahafahan’ilay tompony nisambotra an’i Pitany, raha sendra nandalo teny Analakely, ny alakamisy lasa teo, tokony ho tamin’ny 5ora hariva. Nandritra ny fanadihadiana azy indray no nahafahana nisambotra ny namany iray hafa izay nametrahany ilay skotera dia tsy iza izany fa i Benze. Tratra teny Ankadivato io namany io rehefa nanaovana velam-pandrika ny androtr’io ihany, tokony ho tamin’ny 7ora sy sasany hariva. Marihina fa nitondra fiara izy ary roalahy izy ireo no tao anatiny. Raha nanakana azy ireo ny polisy dia saika nohitsian’izy ireo raha tsy namoaka basy haingana. Tamin’izay fotoana izay dia niaiky avy hatrany i Benze fa any an-tranony ilay môtô. Tamin’ny famotorana natao azy ireo indray avy eo no nahalalana fa samy efa nigadra teny Antanimora i Benze sy Pitany ny taona 2015 ary tany no nifankahafantaran’izy ireo. Fantatra ihany koa fa mbola mamita sazy 10 taona eny Antanimora i Pitany fa manao Mop ety ivelany fotsiny dia izao tratra mangalatra izao indray. I Benze kosa indray mbola misy raharaha hanenjehana azy eny amin’ny Fitsarana ka nidoboka, teny Antanimora izy fa nahazo fahafahana vonjimaika rehefa nanao fangatahana.

Laurena Nany