Miseho lany ny tsy fanarahan-dalàna sy ny fanaparam-pahefana ataon’ireo mpitandro filaminana sasany eto amin’ny tany sy ny fanjakana. Tovolahy iray tompona trano fisotroana indray no niharan’ny herisetran’ny zandary, tany Agnivorano, Taolagnaro, ny alin’ny zoma lasa teo. Nandeha nisotrosotro tao amin’izany toerana izany ilay zandary tamin’io alina io. Araka ny loharanom-baovao dia nanafatra izay nilainy rehetra ilay manam-pahefana. Rehefa lany anefa ireo rehetra ireo dia lasa fotsiny amin’izao ranamana fa tsy nandoa ny laniny satria hono zandary. Tsy nanaiky izany ny tompon-trano fa nitaky ny vola saran’izay laniny rehetra teo saingy vava be hatrany no valiny.

Tsy vitan’izay ihany fa niafara tamin’ny fanimbana ny entana rehetra tao an-toerana izany. Tsy nahazaka izany fihetsika izany ilay tovolahy ka raikitra ny fifandonana teo amin’ny roa tonta ary naratra mafy iry voalohany. Gaga ireo nanatri-maso tamin’ny fihetsika tsy mendrika nasehon’ity zandary ity ary manao antso avo amin’ny lehiben’ny zandary mba hijery akaiky ny raharaha.